中秋晚會追出去拖手　趙麗穎Kenny原來有段情

內地中秋晚會《灣區升明月》尋日（21日）順利舉行，大家都將重點放咗喺謝霆鋒同王菲世紀同場、楊冪前夫劉愷威同緋聞舊愛魏大勛同台合唱上面，原來另一內地當紅花旦趙麗穎都有仔「埋身」，仲要係香港人都好熟嘅英皇藝人關智斌！

話說晚會上趙麗穎僅上台參與群星大合唱《我的中國心》，因為登台明星過多，成個表演趙麗穎得3秒鐘鏡頭，網友本身都大呻冇癮，點知鏡頭後原來有驚喜。當中流量偶像、藝人范冰冰細佬范丞丞嘅Fans為影低男神，就拉個Wide Shot等對方上台，咁啱鏡頭一角就影到趙麗穎準備落台之際，有位着粉色西裝嘅男士就幾個箭步上前，仲衝到佢身邊捉佢手仔，望真啲原來就係關智斌。二人一路行一路耳語，交情明顯唔錯，其實二人早喺2013年就合演劇集《追魚傳奇》，大家先驚覺佢哋8年感情仲Keep到，大讚二人重感情。

而趙麗穎又被粉絲影到喺台下狂玩電話，仲同人傾FaceTime，不斷冧笑Chok Cute樣，唔少人都話一定係佢個仔仔打畀佢搵媽咪呀。