姚焯菲15歲生日晒成熟　小菲象特製生日卡祝賀

《聲夢傳奇》亞軍、有「國民初戀」之稱嘅姚焯菲（Chantel）今日（22日）15歲生日，Chantel喺社交網大晒靚相，留言：「fifteen and blessed」大咗一歲，Chantel嘅打扮都成熟咗，着上黑白連身短裙，即時睇落大個女咗！呢張靚相成功吸咗1.5萬個Like，人氣好高呀！佢仲喺限時動態上載同朋友攬頭攬頸嘅相，一時送心心，一時扮鬼臉，睇嚟玩得相當盡興！而《聲夢傳奇》嘅一班好友，包括炎明熹、冼靖峰等都有拍片送上祝福：「國民初戀生日快樂！希望你繼續做國民初戀。」

另外，有「小菲象」（姚焯菲粉絲）為Chantel整咗張生日卡，卡上全部都係Chantel嘅可愛照片，Chantel都相當感動同滿意，喺社交網貼堂以表感謝！