劉詩詩「大爺坐」登熱搜　邊位靚女「皇帝坐」更豪邁？

內地女星劉詩詩向來都予人一種清麗脫俗嘅感覺，難怪佢喺劇集《倚天屠龍記》能完美演繹「黃衫姐姐」一角。不過，有人話睇一個人嘅坐姿，就可以睇出一個人性格係點，劉詩詩近日出席活動時，佢一個坐姿，揭示出佢豪邁一面，即時登上熱搜，成為熱話。

當日劉詩詩除下高跟鞋同華麗晚裝，換上風褸同休閒褲，成個人當堂舒服晒，冇晒束縛之下，佢即時解放天性，豪邁一坐，成個大爺咁款，唔少網民都話估唔到佢平時斯斯文文，原來坐姿咁有霸氣，仲封佢做「詩爺」添。除咗劉詩詩，另一位坐到成個大爺一樣就要數迪麗熱巴。熱巴雙腿出名修長纖細。但原來佢唔鍾意翹腿坐，唔着裙時，更會嚟一招「皇帝坐」。認真豪爽。

至於「麻花腿」系列，霍思燕一定係代表人物。霍思燕身材出名唔錯，雖然佢懷孕時候，體重曾經到超過160磅。生完BB後就成功去番最Fit時候，身輕如燕嘅佢扭「麻花腿」一坐一啲壓力都冇。至於趙麗穎都好鍾意「麻花腿」咁坐，顯得佢調皮同可愛一面，網民更大讚佢咁坐，會顯得佢大腿更吸睛！