做周柏豪師弟︱吳若希16歲細佬入娛圈　拍節目做Model

歌手吳若希（Jinny）嘅16歲細佬Carson（吳梓楓）向來被指高顏值，身高逾1米8加上單眼皮，似足韓國小鮮肉，因家姐關係早有唔少出鏡機會嘅佢，原來近日正式加入娛樂圈，簽約經理人公司種星堂，成為周柏豪、連詩雅師弟。據知今年升讀中六準備考DSE嘅佢，以兼職方法踩入「模界」，希望賺取外快供自己讀書。

睇番Carson嘅社交網，其實佢早已密密操肌練大隻，為做Model做好準備。另外，佢早於今年6月已經現身師姐連詩雅嘅生日會為其慶祝，似乎當時已經結下同門緣分。至於Jinny本身係周柏豪唱片公司「星夢娛樂」嘅「師姐」，如今細佬又成為對方師弟，認真「一家親」！而Carson日前上載一張工作照，透露已經有電視方面嘅演出，但就唔係跟家姐上TVB，反而係孖住同門師姐黎紀君，亮相香港開電視節目《開間咖啡店2》。