吳鎮宇冇影︱網民唔認得！費曼生日晒「金錶」被指炫富

男星吳鎮宇2014年帶同當年只有5、6歲嘅仔仔Feynman（費曼）參與內地親子真人騷《爸爸去哪兒》第2季，長大後嘅Feynman不時喺社交網更新近況，又同阿爸鬥嘴令人發笑！9月28日13歲生日嘅佢尋日（22日）分享提早慶祝嘅家庭照，甚少出鏡嘅媽咪王麗萍搭住佢膊頭，一眾親友及同Feynman好Friend嘅張達明都在場，唯獨吳鎮宇冇影！而壽星仔就成為網民焦點，除咗佢着上印有自己頭像及「have you ever seen this guy？」T-shirt惹笑外，唔少人都話唔認得佢，話佢長大咗好多，13歲小朋友似足18歲咁，非常老積！

佢仲上載咗隻「金錶」但被網民話「孩子開始炫富了」，佢澄清「沒有」及加個錢Emoji，其實只係漫畫《鬼滅之刃》手錶啫，佢又晒出公仔等有關禮物，依然好有童真！至於吳鎮宇點解唔喺度？Feynman就話因為喺大陸咁話！