陳柏宇「請」剪片師　酬勞竟然係親口唱《你瞞我瞞》

疫情之下有好多歌手藝人都轉型做埋KOL開設自家頻道，得閒拍吓Vlog或者主題片同Fans開心Share，Fans多個途徑支持偶像同時，亦可以更了解偶像私下性格，可謂一舉多得！而平時開慣Live嘅陳柏宇（Jason）睇嚟都想踩入KOL界，日前喺限時動態出Post請剪片師，列明工作時間只需3個鐘，咁都唔算太長時間，暫時睇落都似係份筍工！

之後再望埋令人最關心嘅酬勞，一睇！竟然唔係一個金額，而係獲Hit歌《你瞞我瞞》嘅原唱現場演繹，仲要只係得副歌頭15隻字，睇歌詞即係「無言的親親親，侵襲我心，仍寧願親口⋯」最後嗰句唱都未唱完，好似手緊咗啲咁喎！見Jason再話如果OT，每個鐘再唱多10隻字，諗到呢條橋認真抵死！變相如果要聽晒成段副歌31隻字，要OT 4個鐘！唔知佢出呢個「價」，有冇Fans真係去應徵呢？

未幾！謎底解開了，Jason自拍找數片：「大家好幫得手！條片好快有得睇！所以而（依）家出糧俾（畀）你地（哋）！」果然佢一唱到「仍寧願親口⋯」就即刻停口，咁睇嚟個剪片師冇OT喎！