吳嘉儀上堂當面鬧羅冠蘭夠火爆 原來係演藝「資優生」

2021年09月25日 10:12
東網電視
更多新聞短片
入行6年的無綫藝人吳嘉儀,早前於綜藝節目扮歌手王灝兒(JW)令人印象深刻,原來鏡頭前經常掛笑臉,背後卻是一名烈女,曾試過於課堂期間指摘導師羅冠蘭處事不當,結果被趕出班房,事後校方以其情緒不穩為由禁止她上課,非常火爆!
吳嘉儀科班出身,當年修讀香港演藝學院表演系,並以優異成績連奪兩個獎學金,甫畢業便獲幾個大型劇團聘請為全職話劇團團員,由於一心想向藝人方向發展,便決意報讀無綫藝員訓練班,繼而正式踏入公仔箱,至今已先後演出過數十部劇集,雖然非主角位置,但她仍舊默默耕耘,早前於綜藝節目《開心大綜藝》模仿JW令人眼前一亮,連帶工作量也增多,令其始料不及。
回顧於學院4年讀書生涯,經歷多次淘汰階段,幸嘉儀能留守到最後,不諱言求學期間生活並不如意,失戀、冇錢交學費等打擊下,一度被學校保安走入課室請她離開,其性格亦因而變得火爆,最激一次試過於課堂期間發難:「嗰次上緊羅冠蘭老師演技堂,我被要求演個角色好糜爛,點知開門行入課室,未演就叮我,我好嬲上前問佢點解,點解覺得係我錯?佢就叫我拎袋走。第二日學校就貼Notice話我情緒唔穩定,暫時唔適合上堂。之後我有反思,仲不斷打畀老師,以為佢會鬧我,但佢係關心我,介紹學校社工畀我,仲話我錯係因為個角色年代唔係着嗰啲衫,當下我就明白了,後來真係有睇社工,情況好快有改善,我亦順利畢到業。」
愛情方面,嘉儀拍拖次數5隻手指數得完,自爆曾是港女一名,認為對男友所有要求都是奉旨,結果處處碰釘分手收場,最終醒覺慢慢調教,現時已變成廿四孝女友,有一位相戀4年、從事船務工程的圈外男友,二人感情穩定,嘉儀深信現任男友是步入人生另一階段的不二人選:「經歷太多,試過拍日本男友,又試過同電影系師兄拍拖,大家發展到同居,但最後佢用換門鎖嚟交代分手。依家呢個好多方面都夾,佢有時間會等我收工,有時完美主義,雖然話唔會同我對戲,但有時又忍唔住畀意見。(見晒家長?)我好清楚世伯行蹤,所以如無意外,男友會係我Mr.Right。」