193心理輔導阿Dee 反崩潰爆喊:呢幾年真係好辛苦

20210925
東網電視
更多新聞短片
人氣組合ERROR成員193(郭嘉駿)入行前喺英國大學修讀心理學,近日於網上節目擔任心理學家,治療患有「太過在意小眾Comment綜合症」嘅隊友阿Dee(何啟華),房間牆身貼滿負評,193認為阿Dee過份在意網民評論,而治療方法係將負面留言讀出嚟。193自爆亦曾經好在意外界評論,藉此幫助阿Dee跳出框框:「我當初太在意別人評論,我唔會亂講嘢,唔會將真實諗法講出嚟,就唔會有今日咁多人Follow我哋,唔會咁多人翻睇ERROR啲舊片!」不過被心理醫生Natalie踢爆,指193仲係好在意評論,193不諱言:「我就係在意,所以我唔睇,唔睇就唔需要在意,我就活得開心啲,呢個係我自己得出嚟嘅結論。」
之後Natalie播番193參加ViuTV節目《全民造星》嘅片段,播到佢唱《我的快樂時代》,193忍唔住落下男兒淚話:「每次聽呢首歌都會提醒自己,有啲迷失就會聽,呢幾年都真係……好辛苦,好唔易過其實,見到當初自己咩都唔識、咩都被人批評,到而家我以為自己都……我睇番我係另一個我,唔係當初嗰個我。好似最近我去紅館做嘉賓,我聽番都覺得自己唱得幾好,同當初嗰個我真係完全唔同咗,但人哋可以一句嘢抹煞你,可以話『你都係因為一句串咗隔籬台就紅咗』,佢哋抹煞咗我呢3年嘅努力,都繼續有人話我唔識唱歌、唔識跳舞、冇努力過,所以我先唔想睇啲咁戇X嘅Comment,因為我知道自己入面係啲咩,所以都希望我身邊嘅人唔好介意呢啲Comment,唔好被影響。」
阿Dee隨後出場,指佢「係一個更加Better嘅郭嘉駿」,193聽到又再喊,阿Dee即攬攬嗌「好兄弟」畀鼓勵。