懶理天后形象！容祖兒驚嚇變臉　網民讚玩得夠放

天后容祖兒日前忙完晚會演出之後，有得休息吓抖一抖氣，佢尋日（25日）喺社交網晒咗張自己上床瞓覺嘅卡通相，寫上「休息一陣」！難得有時間抖，當然要搵嘢玩啦，佢大晒自己玩Key圖App嘅片，睇到佢着上彩色衫同個頭包上毛巾，造型夠晒搞笑，佢仲完全唔顧形象將自己「變臉」，就算Key到自己勁大隻眼、勁大個口，爆晒棚牙出嚟都唔介意，玩到好盡喎！

雖然睇落個樣有啲嚇人，但係網民都冇畀佢嚇親，唔覺得佢醜之餘，仲讚佢好可愛添！有網民就讚佢想像力豐滿，可以變出咁多唔同嘅奇怪「面相」，一啲都唔容易呀！而有網民就讚佢玩得夠放，就算玩到「女神崩壞」都唔怕，仲問佢有咩係唔夠膽玩㗎呢？