讚高海寧夠Pink　張振朗知衰：大鑊！

藝人高海寧（高Ling）、張振朗、陳展鵬、楊卓娜、糖妹和黃建東等為新劇《童時愛上你》在九龍塘一婚宴場地開工，劇情講到飾演化妝師的振朗在台上為高Ling化妝，鏡頭前後2人笑料十足，振朗大讚對方皮膚好，妝前妝後分別不大，嘴唇是天然粉紅色，高Ling聽到被讚唇色粉紅即掩嘴大笑，振朗擔心大家諗歪，尷尬暗叫：「大鑊！」

高Ling之後扯開話題，又自認是無綫藝員之中笑點最低的三甲，振朗說：「佢戲裏面好似8歲小朋友，慢慢我好似同狗仔講嘢咁。」高Ling笑說：「振朗真係當我狗仔，成日叫我：『No！Stop！』咁訓練。」

另外，陳展鵬表示戲中與多位演員關係複雜，首次與胡楓合作感到很開心，因角色連繫多人，戲份變相很重，笑言變了十項全能：「因為同期開緊《廉政狙擊》同《隱形戰隊》，雖然呢部唔使打，但對白好多，記稿會攰啲，都擔心亂咗，眼神連唔到戲。」