歐陽娜娜同Jennie撞衫 網友質疑抄造型!

20210927
東網電視
更多新聞短片
台灣藝人歐陽娜娜最近網晒靚相,相中嘅佢紮咗丸子頭,着低胸背心加綠色外套,令本身21歲嘅佢,即刻再減齡變番16歲卜卜脆少女。呢載相吸引到大批網民關注,因為發現佢同韓國女團BLACK PINK成員Jennie,撞衫撞到嘭嘭聲!嗰件綠色外套,幾乎一模一樣,只係Jennie件外套多咗金色鏈,仲有網民話娜娜係連髮型都學足,留言反問:「尷尬嗎?」又有網民直情冇面畀:「更喜歡Jennie穿起來的感覺」。
娜娜同韓國女團BLACK PINK成員撞衫,其實已經唔係第一次,之前同其他成員Lisa同Jisoo撞過,仲有另一個韓國女團aespa嘅內地成員寧藝卓着過同款嘅衫外,更加試過同張栢芝、楊冪撞過衫,難怪網民狂笑娜娜係「萬人Copy Cat」!
究竟係有心定無意,雖然只有娜娜自己知,不過佢的確好鍾意Jennie,佢除咗瘋狂點讚Jennie嘅post外,又翻唱過對方嘅《Sure Thing》,仲擺埋上網同BLACK PINK分享。所以或者可以咁樣推斷:其實娜娜唔係抄Jennie個Look,只係向Jennie致敬,同時佢嘅偶像,仲有Lisa、Jisoo、寧藝卓、張栢芝同楊冪等,娜娜只係一個博愛嘅粉絲,咁樣諗,係咪好啲呢!