姚焯菲自爆新劇角色：同自己冇乜分別！

憑無綫節目《聲夢傳奇》一夜爆紅嘅「國民初戀」姚焯菲（Chantel），日前（22日）15歲生日，獲粉絲「小菲象」出動巴士應援慶生，又孖住同樣9月生日嘅林智樂（Felix）齊齊搞生日派對，吸引大批粉絲到場支持，勢頭強勁。而兩位壽星仔、壽星女以及蔡愷穎（Lolita）亦有於社交網一同開直播，當中Chantel有別平日出鏡濃妝造型，素顏上陣，加上一頭天然微波浪嘅秀髮，自然得嚟相當清純，即時少女味爆棚，獲粉絲大讚：「好Pure好Ture」、「終於似返15歲」。

期間，佢哋又透露正準備拍攝劇集，Chantel更率先劇透各人角色：「其實我個角色同自己冇乜分別，大家都係，除咗火雞（孫漢霖）之外，我諗全部人都差唔多。」並表示背劇本方面好有難度。至於問到Chantel爆紅後重返校園有咩唔同，佢就指有唔少低年級嘅同學向佢拎簽名，而老師對佢嘅態度則同以前一樣。