出街食飯畀人圍！黃曉明自掏銀包豪請全場食嘢

內地男星黃曉明靚仔形象深入民心，但係早前佢為拍戲喪減肥，仲要變禿頭阿伯，簡直係男神崩壞！完成拍攝之後，佢嘅體重已續漸回復正常，顏值亦返晒嚟啦！近日有網友喺餐廳食飯嗰陣，咁啱撞到黃曉明，當時曉明着住一身黑色西裝外套，內配白色T恤打底，網友大讚佢真人靚仔過上鏡，近睇佢嘅皮膚冇瑕疵，皮光肉滑，完全唔似43歲！

表現親民嘅曉明全程面帶笑容，不斷揮手打招呼，畀人任影唔嬲，全冇明星架子！網友仲話曉明當日大方請客，為餐廳嘅每一枱客人送上一道菜，網友估計佢要自掏銀包花上萬蚊，真係夠晒豪氣！而佢食完飯步出餐廳之後，仲畀唔少圍觀者重重包圍，最後要靠工作人員護送離開，人氣真係勁到爆！