狼吞漢堡包！吳京被催拍《戰狼3》反應萌到爆

內地武打影星吳京同時有兩套戲上映，近日忙於為新戲宣傳嘅佢，日前喺社交網晒咗同拍檔胡軍、朱亞文一齊食漢堡包嘅相，留言：「真香啊！」睇到佢哋3個大男人狼吞虎咽，吳京個樣仲好似骾親添，睇嚟佢哋真係餓到爆喎，未知係咪忙住開工冇時間食飯呢？胡軍留言話食完都仲未飽，而朱亞文亦有晒佢哋鯨吞漢堡包嘅相，搞笑話「吃慢點」！網民就讚佢哋完全不顧形象嘅食相，堅係真性情！

另外，憑《戰狼》系列電影爆紅嘅吳京，現身另一部自己擔任導演兼演員嘅新戲宣傳活動時，表示將來會拍啲不一樣嘅軍事題材電影，結果惹來台下觀眾起哄大嗌「期待你的《戰狼3》」，佢聽到被觀眾催戲，表現無奈，大晒萌爆表情包，合埋雙眼擰轉面，直頭想「搵窿捐」呀，相當尷尬，佢仲同觀眾講「我記住你呀！」認真搞笑！