撞樣李政宰︱收《魷魚遊戲》卡片　譚俊彥Say No！

韓劇《魷魚遊戲》熱爆全城，其中香港藝人譚俊彥更被指與劇中男主角韓星李政宰撞樣，而成為熱話，食住呢股熱潮，呢日譚俊彥就拍片親自「神還原」李政宰飾演嘅「456號」一角。

片中藝人鄧佩儀客串演出，扮工作人員向譚俊彥送上《魷魚遊戲》中嘅卡片，譚俊彥即時面露驚訝表情，仲立刻耍手擰頭拒絕參加，場面搞笑！其實呢日2人係合體為即將播出嘅主演新劇《換命真相》拍攝宣傳片，並趁空檔時間拍片自娛，唔少圈中好友包括湯洛雯、鄭俊弘及周志文等，都笑指譚俊彥同李政宰簡直餅印一樣。