打波姜濤最攞命　巨躉頂走髮型師！

人氣組合MIRROR成員姜濤熱愛打籃球，不時被人野生捕獲，有新聞報道消委會測試止汗劑同香體劑時，仲加插姜濤打籃球嘅畫面，紅到上港聞！

姜濤打籃球有一手，佢喺社交網晒出同髮型師打籃球嘅片段，姜濤同髮型師1 ON 1，姜濤恃住自己有身形優勢，背身頂住髮型師，用巨躉慢慢爆籃落底，髮型師毫無還擊之力，姜濤仲喺度戲耍對方，將籃球打向籃板再自己搶番，髮型師連波皮都掂唔到，之後姜濤仲玩埋夢幻步，左Fake右Fake玩殘對方，最後玩到厭先射個波入籃，原來打波姜濤最攞命！