絕密片段曝光︱波波飛擒方力申　馮盈盈冇眼睇嚇到呆

無綫節目《#後生仔傾吓偈》今晚（2日）播出最後一集第848集，唔少網民都表示不捨，而陸浩明（6號）除咗晒出多張合照，仲公開波波（黃婧靈）生擒男嘉賓方力申片段，「飛擒大咬」嘅波波撲上去對方身上，而方力申就單手攬實對方纖腰擺甫士影相，波波落地後一面尷尬雙手合十鞠躬表示謝意，而方力申就摸一摸波波個頭！與方力申早前傳出緋聞嘅馮盈盈就一面驚訝擘大個口笑，唔知佢當下諗緊咩呢？

佢都有得被撲埋身㗎，之不過係被狗撲咁解！無綫big big channel官方社交網就喺社交網回應大家訴求，問大家有冇咩想問！有網民就提出「FYY（馮盈盈）啲蝦碌嘢」，點知小編就回應「話說有一次後生仔拍水上活動，喺休息嘅時間突然走咗兩隻巨型毛孩…撲跌咗FYY…」仲附送咗事發現場照片，見盈盈坐咗喺地上，雖然被撲跌，但露出燦爛笑容，一隻手仲輕撫其中一隻狗，真係好有愛心，不過都唔夠佢露白滑長腿吸睛呀！