Lokman都有玩！張敬軒髮髻Look晒琴技　養生飲料大公開

歌手張敬軒最近搬咗新居，更將Working Space同粉絲分享，一切安頓好後，軒仔終於有時間喺錄音室彈吓琴，見佢上載一張彈緊琴嘅短片上社交網，自稱亂彈嘅佢，其實彈得鬼咁好聽，真係令人聽出耳油，不過軒仔又點會只係騷琴技咁簡單？！重點係佢個髮型呀，佢紮咗個「男士丸子頭」，認真走在潮流尖端，呢個頭連MIRROR隊長Lokman都有玩，軒仔就留言話自己「尋秦記髮型亂咁彈啲嘢」。

而片中軒仔仲用一個圈圈住一杯飲品，寫住「好味Kombucha」，究竟係乜東東呢？近年注重養生嘅軒仔謝絕一切零食，呢杯嘢原來就係佢養生法寶，紅茶菌（Kombucha）係一種發酵飲品，簡單解釋就好似乳發酵；紅茶菌用紅茶中的糖分及單寧酸發酵，繼而產生酒精、醋酸、益生菌及維他命B。味道酸甜像果醋，略帶酒香，係養生必備佳品，連麥當娜都係佢粉絲！