鍾嘉欣晒超流利英文　網友直呼「耳朵懷孕」

藝人鍾嘉欣去年回港拍攝無綫劇集《星空下的仁醫》，更成為今年嘅台慶劇，有望衝擊視后寶座！現時身在溫哥華嘅佢，雖然未能返港宣傳，但就繼續於個人影片頻道拍片Keep住人氣，同時為新劇造勢。呢日佢就拍片大玩急口令，出名英文水好嘅佢挑戰英語急口令當然完全無難度，第一次試玩即一Take pass，部分急口令更係零失準，3秒讀完一句長句子，相當犀利，網友就笑指其口音動聽到「耳朵懷孕」。

之後，佢再大玩中文急口令，雖然佢自去年回港拍劇後，已有接近一年冇長期講廣東話，但咬字依然非常標準，閱讀中文字都完全冇問題，不過就愈讀愈亂，唔單止將「雞骨」同「龜骨」撈到亂晒，仲將「邰」字讀錯成「邵」字，但網民一樣受落，大讚佢廣東話冇退步。