商場騷遇女MC爭嘢講　劉愷威硬晒「罰企」

長駐內地掘金嘅劉愷威，早前賺商演騷錢出席個商場仔嘅活動，有錢搵梗係開心啦，不過佢今次就唔係賺得咁爽，仲有啲尷尬添。喺網民上載嘅相片中，戴平光眼鏡，穿咗黑色衞衣、白色衫再襯深色休閒褲嘅佢，雖然斯文又靚仔，不過佢身邊嗰位女MC似乎唔係好識分莊閒，揸住個咪係度不停講講，盡力炒熱氣氛，搞到主角嘅好似係佢咁，而劉愷威就變咗人肉布景板，面上露出牽強笑容。由於佢企咗勁耐，又一直冇咪到手，惟有揸實個拳頭，亦可能係因為主辦單位冇安排要保持社交距離，佢同啲群眾都好近，喺冇安全感下，心情有啲緊張都有可能。

等到個女MC終於開完Talk Show，佢終於有咪用，可以用廣東話同啲群眾Say個Hi時，佢先有番啲笑容，而圍觀者見佢「罰企」咗咁耐，都好識做報以歡呼聲同掌聲，證明就算冇咗楊冪老公嘅光環，啲人都知「劉愷威是誰」。