容祖兒晒天籟之音　阿Sa阿嬌化身國際級臨記

「英皇龍虎豹」容祖兒、蔡卓妍（阿Sa）同鍾欣潼（阿嬌）感情深厚，佢哋仲合體拍新節目《容我Sa嬌》（暫名），四圍去玩勁開心！最近天后祖兒出咗新廣東歌《不配》，祖兒喺社交網晒出唱歌片，仲搵嚟阿Sa、阿嬌喺旁邊Chok晒樣，佢留言：「Action 多謝兩位國際級演技臨時演員被迫營業。」但原來阿Sa喺度忍笑：「忍笑忍咗好耐！」

不過點都好啦，網友見到佢哋三個合體都好興奮，留言：「龍虎豹永遠在一起。」、「下次mv可以搵阿嬌做女主角。」、「天使的聲音。」另外，韓劇《魷魚遊戲》熱爆全球，天后祖兒都有湊熱鬧，用App玩《魷》中嘅「123木頭人」，但祖兒玩得好水皮，頂得幾秒就被Foul！