【娛刺撈飯】被插博宣傳 楊洛婷叻女嚟呀!

20211011
東網電視
更多新聞短片
無論你係巨星又好,奀星又好,依家係萬人景仰,定係霉過腐乳,喺呢個網民先係老闆嘅年代,圈中人做每一件事,講每一句說話,都要諗過度過,有咩行差踏錯,公開災難OF THE DAY嘅主角隨時會係你,過後想補鑊?想掹都未必掹得番。最近前港姐亞軍楊洛婷,話畀前公司逼整容,依家餘波未了,無論係娛記定網民,都CHUR住要佢講清楚件事呀。
03年港姐亞軍楊洛婷,依家係本地樂隊Dear Jane主音Tim嘅老婆。最近Dear Jane開演唱會,分享入行以嚟嘅辛酸,洛婷亦都喺社交網發千字文,大爆曾經畀舊公司無理逼整容,佢話件事喺06年發生,佢係到14年先同TVB約滿和平分手,洛婷依家咁講,矛頭似乎係直指無綫喎。
洛婷呢次爆大鑊,單料咁Juicy,好多媒體都大事報道。阿Tim啱啱帶領Dear Jane開咗之個叫好叫座嘅演唱會,但計番報道嘅版面同篇幅,阿Tim都輸晒畀老婆,可能連阿Tim都估唔到呀。做呢行最緊要夠爆又有Noise,阿Tim你真係要學吓老婆喇,Dear Jane下次或者唔止開5場演唱會呀。
最近洛婷出席公開活動,引嚟大批記者採訪,大家嘅注意力都集中喺,究竟舊公司係咪指無綫呢?之前心口有個勇字、爆料爆得好開心嘅洛婷,估唔到呢次嚟個反高潮,帶記者遊花園,話之前自己做過好多間公司,唔肯直接開名,邊間公司咁無恥咁冇陰功逼佢整容。
件事屈咗15年,洛婷你都谷谷埋埋好辛苦架喇,點解唔開名,等全港市民同你主持公道呀?咁樣講啲唔講啲,你唔驚啲網民,話你只係老作博見、唔敢同嗰間無良公司當面對質咩?雖然你口口聲聲話,自己冇作故仔、講嘅嘢句句屬實,但咁樣收收埋埋,大家去懷疑都唔係冇道理喎。
洛婷話自己唔講嘅原因,係因為本身發千字文,只係想冧老公,畀人逼整容件事唔係重點喎。其實去冧老公,都有好多方法嘅,臨瞓前錫佢一啖講聲Thank you Baby又得,寫張紙仔畫個心畀佢又得,其實寫埋上網都冇問題架,今次如果唔寫「畀人逼整容」幾隻字,唔通大家又感受唔到你有幾愛幾撐阿Tim咩?所以下次坦蕩蕩咁寫感受之前,最好參詳吓個內容先,唔係好似依家咁,引到全香港人留意,又搞到網民質疑你就唔好啦。
諗諗吓洛婷其實好叻女,阿Tim呢一刻,可以話去到事業嘅高峰,呢個亦係佢身為老婆,最驕傲、最啱發表感想嘅時候,除咗多謝老公之外,唔覺意仲爆埋呢個不幸嘅遭遇,好多人都應該好心痛。依家洛婷喺司儀界發展得唔錯架,近排個市旺番,加埋今次嘅超高曝光率,相信唔少公司,都有興趣搵呢個曾經被受逼害嘅靚女,為佢哋Event做司儀,據聞洛婷一個Job都收近六位數,唔知呢刻有冇諗住加價呢?