老是常出現︱Edan踩落無綫御用大牌檔拍MV

男團MIRROR人氣成員Edan（呂爵安）新歌《My Apple Pie》MV於網上熱播，推出5日已有逾144萬點擊，認真犀利！Edan呢次搵嚟佢嘅港大師妹、有最索星二代之稱嘅林愷鈴做MV女主角，其中一場戲講到Edan孖林愷鈴喺大牌檔同朋友食飯嗰陣，林愷鈴畀男仔「抽水」，Edan為咗保護林愷鈴，同人大打出手，上演英雄救美Man到爆，而林愷鈴嘅「驚艷」演出，亦獲得唔少網民大讚！

有眼利嘅網民發現呢場戲拍攝場景熟口熟面，原來就係有「無綫御用大牌檔」之稱、位於九龍灣嘅合興大牌檔，呢度曾經係唔少無綫劇嘅拍攝場地，包括劇集《金石良緣》、《十八年後的終極告白》等，真係「老是常出現」喎！有網民就話估唔到Edan會踩落「無綫御用大牌檔」拍攝，依家個MV咁Hit，唔知佢嘅一班「爵屎」（Edan粉絲䁥稱），會唔會落去打卡呢？