楊冪笑周筆暢冇睇過《仙劍3》：你真土！

內地女星楊冪貴為內地劇「收視女王」，當然拍過唔少深入民心嘅劇集，好似有《三生三世十里桃花》、《談判官》等，收視屢創佳績！但係佢嘅閨蜜周筆暢，近日喺內地節目中竟然話冇睇過佢套經典劇《仙劍奇俠傳3》，令到全部人都大跌眼鏡，真係估佢唔到喎！

事緣係喺節目中，周筆暢問單依純聽過最舊嘅電視劇歌曲？單依純話係楊冪主演嘅劇集《仙劍3》主題曲《生生世世愛》，而出名鍾意講笑嘅周筆暢，聽到單依純咁答之後，就話自己冇睇過套劇囉！其實作為閨蜜嘅佢又點會未睇過楊冪嘅經典劇，佢之後喺社交網即刻就「補飛」大晒楊冪喺《仙劍3》嘅劇照，推薦番畀網友睇添！而楊冪亦有社交網留言嘲笑周筆暢「你真土」，再寫上「懂得都懂」明寸對方！網民睇見佢哋兩姊妹嘅互動，都話相當之搞笑，有網民仲拎番楊冪喺2009年播出嘅《仙劍3》嘅劇照出嚟睇，話回憶返晒嚟添！