最美舞者唔易做 容祖兒拍Vlog紀錄辛酸史!

2021年10月13日 00:02
東網電視
更多新聞短片
天后容祖兒喺《蒙面舞王》第二季中大晒舞技,喺《蒙面舞王終極盛典之夜》更獲「蒙面舞王之最美舞者」,認真犀利!祖兒喺社交網上載Vlog,紀錄低參加《蒙面舞王》時嘅點滴,8月22日第一次錄影時,見祖兒下晝5點就開始練舞,去到夜晚8點都繼續練緊,去到9點就試妝並同面具設計師溝通,夜晚11點開始綵排,認真辛苦!
8月31日第二次錄影,佢拉筋熱身時話:「這兩、三天裏學的第三支舞,覺得自己的空間好像突然買了2個TB(儲存單位),所有東西都沒辦法記住了,感覺沒有一個緩衝空間,好在心情也沒有太緊張,整個團隊都好安心,我覺得開心就好。」晚上練舞時,祖兒換上身金衫,佢仲搞爛GAG,叫大家估一個成語,答案係:「一鳴驚人(普通諧音:一名金人)!」真係爛到爆呀!
去到9月3日第三次錄影,祖兒繼續瘋狂練舞,但今次錄影比較特別,因為有好友阿嬌同阿Sa嚟探班呀,齊齊為祖兒打氣,非常有愛!10月1日最後一次錄影,對於最後一次表演,祖兒大感不捨:「這個面具,最後一次戴,以後不知道它會在哪?」祖兒每次錄影都錄到三更半夜,每次表演都出盡全力,真係有血有汗,「最美舞者」呢個獎絕對得來不易!