隋棠溫昇豪11年後合體：誰說「分手後」不能是朋友

台灣女星隋棠喺電影《撒嬌女人最好命》嗲爆講嘅一句說話「怎麼可以吃兔兔」成金句，其實早喺11年前佢同溫昇豪主演、以小三做題材嘅劇集《犀利人妻》都有爆點，當年劇集紅極一時，劇中飾演正印嘅隋棠眼見表妹勾引老公，決心同溫昇豪離婚︰「可是瑞凡（溫昇豪飾演），我們回不去了！」呢句台詞成為金句！

事隔多年，日前溫昇豪同隋棠合體，更頭貼頭影合照Upload喺社交平台，仲搞笑改編當年金句「回得去了！」並留言︰「誰說分手後不能是朋友。」勾起劇迷回憶！亦有劇迷提議佢哋可以轉用另一個身份再合作。