全世界最慢︱阿Sa呻未睇《魷魚遊戲》 網民激推演姜曉

2021年10月13日 12:05
東網電視
更多新聞短片
由韓國影帝李政宰主演嘅《魷魚遊戲》全球大熱,好多人都話希望會拍第二季,等睇李政宰復仇。依家《魷》劇都播咗大半個月,好多人都睇晒9集,但身為煲劇狂熱分子嘅蔡卓妍(阿Sa),竟然一集都冇睇過。
現身在內地嘅阿Sa喺社交網上載一張素顏相,見佢喺臉上加上三角形、圓形、正方形嘅《魷》劇標誌圖案,又寫上:「其實未睇!」擺明大呻自己好Out,唔少網民留言叫佢快啲追番套劇,唔係邊有話題,亦有人話如果拍港版《魷》劇,可以搵阿Sa演「姜曉」一角,一定成為話題添。
至於《魷》劇自從上月上架後,就獲得高收視及討論度,甚至拿下所有非英語系劇集收視冠軍,有網民關心《魷》劇有冇機會報名《艾美獎》。據外國傳媒指,由於《魷》劇發行商係Netflix,所以絕對有資格參加《艾美獎》,但不同於奧斯卡可以同時報名「最佳影片」以及「最佳外語片」,艾美獎喺「最佳劇集」及「國際艾美獎」中,只能擇一項參加。