讚Lokman稱職男友有交帶 「天團嫂」Luxi爆唯一缺點

2021年10月13日 23:01
東網電視
更多新聞短片
人氣天團MIRROR隊長Lokman(楊樂文)有「頭巾兵團」力撐,又有舞蹈員出身的女友Luxi沿路陪伴成為最強後盾,她讚男友有交帶無可挑剔,唯一缺點是躁底,卻又笑言只會「躁一秒」,所以嬲唔落。
Lokman 甫出道便公開有另一半,其拍拖4年多的女友Luxi Yan Wu,中文名甄吳露茜,「甄吳」這複姓非常特別,原因是她在巴拿馬出世,沿用當地人以父姓加母姓作為姓氏的傳統。Luxi現年27歲,本是舞蹈員及模特兒,大學畢業便做dancer,跳過許冠傑和譚詠麟的紅館騷、任賢齊的澳門騷, 又隨天王郭富城走過內地多個城市表演。
初次合作怕怕
Luxi做新人參與首個大騷《炫舞場》舞台劇就認識了Lokman, 可謂跳出愛火,當時Lokman已經是主角,問是否第一眼見對方就觸電?她笑說:「冇咁戲劇性,佢自己都講過細個時脾氣火爆,其實第一次記得呢個人,係我讀緊大學時睇佢跳battle,對佢有印象,係佢同人發生碰撞發脾氣,當時覺得呢個人咁冇禮貌嘅。」又不諱言綵排舞台劇再遇Lokman的確有點害怕,不過經歷密集式排練終日久生情。
讚稱職有交帶
看到男友多年來付出努力終捱出成績,一步一步成為人氣天團,Luxi都替他開心,作為女友而獲封「天團嫂」並帶挈有廣告拍,她說:「佢成長我都成長。」卻無意隨男友走「造星」路,她選擇當模特兒,探索更多可能性。她又爆料指Lokman外表雖有隊長風範,私底下其實好低能、好搞笑,非常適合拍笑片,期望未來在大銀幕看到他的演出。作為圈中情侶,Luxi認為有共同語言是好事, 不論開心、困難都會感同身受。作為另一半,她讚男友稱職,有交帶、從不失聯,無可挑剔!唯一是他唔夠瞓就躁底,試過拍《IT狗》後接着拍MV 再直落開劇,連續2日冇得瞓,Luxi說:「但佢只會躁一秒就自己收,唔知邊個點觸怒佢,係會費解!但你見佢2日冇瞓覺,可以嬲佢咩呢?會體諒,只要夠瞓佢就冇嘢。」