胡定欣放聲氣 男友要靚仔兼識入廚

20211014
東網電視
更多新聞短片
藝人胡定欣曾於節目《美女廚房》中慘受劣評,如今在新煮食節目《男神廚房》中反過來為男藝人評分,坦言感覺特別,笑說:「喺個咁Grand嘅場合,就算唔好食,吐出嚟都要有儀態啲,啲人話女仔要入得廚房出得廳堂,依家睇靚仔都要睇佢識唔識煮嘢食。(靚仔會加分?)呢個係視覺上嘅享受,我都希望渴求搵到咁嘅人,實在太耐冇食過男仔煮嘅嘢食。(搵男友都要呢啲要求?)我會努力,又靚仔又識煮嘢食,唔一定要好睇,依家好多男仔都好鍾意煮嘢食,我可以係佢哋身上學。」
日前她與爸爸出動打網球,獲網友讚爸爸又後生又弗,定欣說:「畀佢搶Fo添,嗰日係爸爸教我,佢都打咗一段時間,我呢排拍完劇休息緊,所以想搵一個運動可以一齊做,點知打一次就愛上,所以好想認真搵個教練學習。」談到今年未有作品出街,不用為今屆角逐視后而添壓力,已是視后的她笑說:「都冇壓力咗幾年,但我嗰套《白色強人II》應該出年會播,依家做緊後期,慢工出細貨嘛!(你啲好姊妹分別都有作品喎!)好鍾意黃智雯同袁偉豪喺《把關者們》呢一對CP,係Die Hard Fans,佢哋螢幕上好登對(咁睇好邊個拎視后?)今年仲有姚子羚、林夏薇,真係手掌同手背都係肉,好難揀。」