開台解答愛情疑難 陳柏宇自爆同舊愛有見面

2021年10月14日 21:02
東網電視
更多新聞短片
歌手陳柏宇(Jason)踩入KOL行列推出「陳伯吹水台」,愛情專家「上身」出片解答網民嘅情侶相處問題,佢講到拍拖唔係永遠都咁完美,當中會做錯好多決定,所以要學識遷就、忍讓同忍耐,仲要將自己心中感受講出嚟,絕對唔好收收埋埋。
然後自爆前女友唔鍾意佢同其他女仔玩,當時為咗愛人佢真係少咗出街,依家諗番就知係非常錯,唔應該被對方控制,再抵死拖老婆Leanne(符曉薇)「落水」做例子,指老婆到依家間唔時都會同前度見面食飯︰「唔係大方,而係你唔畀佢見面你小家咋!我冇特別大方,佢哋依家又唔係出去偷食,人哋都有過幾年感情,都係朋友。」再爆自己一樣都有同舊愛見面︰「但我唔係吓吓都諗住係咪仲有機會!梗係唔係啦!你唔係咁諗咁點解覺得人哋會咁諗呢!」
之後讀到有網民控訴另一半要求上繳所有社交平台嘅密碼,否則分手,Jason動怒直斥︰「佢直情唔信任你啦!呢個行為真係唔要得!你一定要畀對方有佢自己嘅私隱,你更加要保持自己有私隱,但呢個保持唔係為咗唔好畀人知你做錯過啲咩,你一定要頂天立地!」有工作人員問Jason︰「如果有一日Leanne話要管番Abigail(囡囡)個社交平台,你會唔會畀密碼佢?」點知Jason笑言佢都冇咗個密碼︰「我成日都叫佢自己開過一個,呢個係我嘅Project,佢媽成日都想我Post佢啲相,同我想Post嘅係唔同,所以我鼓勵佢幫Abi開一個新嘅。」