甄子丹細仔彈《月半小夜曲》　李克勤認證：太有才！

「宇宙最強」甄子丹除咗打得之外，彈琴亦相當了得，琴技達十級，而佢嘅彈琴天分仲遺傳埋畀細仔甄濟嘉（James）添！子丹之前喺社交網晒James彈琴嘅片，James嘅彈奏可謂技驚四座，令人聽到如癡如醉，網民大讚佢係天才，仲話子丹「後繼有人」，有網民就問James會唔會做鋼琴家呢？

雖然子丹喺法國同荷里活巨星奇洛李維斯拍《殺神4》，但都不忘再網晒James彈琴片，James今次彈李克勤嘅名曲《月半小夜曲》，睇到佢運指若飛，身體仲跟住節拍擺動，非常投入專注，人曲合一，簡直係大師級嘅演出！就連原唱嘅李克勤都有「認證」，親自留言畀Like，話好鍾意James嘅彈奏，大讚對方：「太有才了」！而網民就讚James青出於藍，仲話好想睇子丹同James以父子檔姿態上台演奏，一較高下喎！