言承旭公主抱喪轉熱狗　HeHe情洋溢登熱搜

台灣型男言承旭因上內地綜藝節目《披荊斬棘的哥哥》人氣急升，他在節目中不時爆喊，一滴男兒淚盡顯真性情。不過言承旭唔係淨係識喊，喺節目嘅一個舉動，更融化出名剛強嘅內地歌手熱狗，將對方由大男人變成「小鳥依人」。

言承旭喺節目中問熱狗：「熱狗哥，你唱英文可以嗎？」熱狗隨即表示自己嘅英文唔太好，但言承旭就話：「如果你唱英文，會帶給觀眾不一樣的感覺！」喺佢盛意拳拳之下，熱狗再冇推卻佢嘅建議，向言承旭表示：「那麼我們一起練（英文）吧！」此時言承旭即時笑晒，更二話不說，將熱狗抱起來，並來個「公主抱」，一轉就咗十幾個圈，雄赳赳嘅熱狗就似小女友般深情望住言承旭。

言承旭之後喺社交網分享今次深情一刻嘅照片，並寫道：「重看這段自己都覺得這麼好笑！」唔少網民都話發夢都估唔到熱狗變成小鳥依人，有人更留言：「公開戀情嗎？」非常搞笑，言承旭更因今次「公主抱」登上熱搜呢！