炒車相晒兄弟情 AK天衡@ONE PROMISE冧豬慶生

20211016
東網電視
更多新聞短片
人氣MIRROR成員Anson Kong(AK)同樂隊ONE PROMISE結他手天衡私下老友鬼鬼,喺音樂上仲已經合作過兩次,原來就連生日都只係相差一日,唔怪得之Friend過打Band!繼上年佢哋一齊慶祝生日後,前日喺天衡生日(15日)前夕,佢哋約埋成班朋友,包括MIRROR成員Alton、Frankie、ONE PROMISE隊員文廸、Anton同Sora等開生日Party,見兩個壽星仔齊齊切3個大蛋糕相當Happy,但就喺吹蠟燭嘅一刻被影低「炒車」醜照,擘大口得個窿令人發笑!事後AK Post相留言向天衡「示愛」︰「生日快樂,兄弟!也是我的老師,今年多謝你幫我寫咗兩首歌,繼續一齊並肩作戰,一齊有型、一齊炒車!愛你Tina!」
另外,天衡都有連出幾個Post「多謝」3位隊友輪流送出嘅「愛」,不過啲留言睇落似嫌棄多啲,認真抵死︰「嗰一刻我真係覺得好核突,呢班人真係會『賴』落我度,我一諗起三條脷、口水鼻涕喺我條頸或者頭髮或者塊面,我就即刻反胃,係真反胃!」古有「打者愛也」,今有「『賴』者愛也」,相信面露猙獰嘅天衡會全單接收兄弟們嘅「心意」。