做大人好難！高海寧失憶變小朋友開心得多

由高海寧（高Ling）、張振朗和袁文傑主演的無綫新劇《童時愛上你》，日前進行外景拍攝，劇情講到長子雷德信（袁文傑飾）得悉由高Ling飾演的妹妹雷紫彤，因意外導致記憶出問題，只擁有童年記憶，但父親一直將事情隱瞞，袁文傑則想利用此消息作反擊，將妹妹從主席位置拉下來。

高Ling受訪時坦言做大人好難：「無論戲內戲外大人要好清醒，我哋除咗背對白，仲要好清晰上下場口要做乜，做小朋友就可以自由發揮同少少任性。彤彤呢個角色令我學到好多嘢，做大人要諗過度過先講，考慮後果先做，要顧面子搵藉口，小朋友思想簡單直接，諗到乜就講乜，做咗先，其實對於解決問題，呢種表達方式先係更好。」

不過若有得選擇，現實中她仍選擇做大人：「10幾20歲覺得自己仲有大把時間，做好多無謂嘢，但人大咗，會識得利用時間去做更多自己想做嘅事。」身旁拍檔張振朗笑稱：「佢係大細路，演小朋友冇難度啦！哈哈！不過佢依然會交足貨，記得有場戲講佢一路聽我講故事一路喊，就算鏡頭冇影佢，都keep住喊交足戲畀我演落去，睇得出佢專業同好鍾意演戲。」