笑伍仲衡揀老歌　吳業坤發台瘟：啲歌同我一樣年紀大

歌手吳業坤參與《伍仲衡再搞花臣音樂會》頭場演出，與劉威煌合唱經典歌曲如《留住我吧》等，吳業坤與觀眾揮手時笑言：「好彩我都有兩塊燈牌。」但唱到《傾心》，他一度忘記歌詞甩嘴及唱錯part。

受訪時講到甩嘴，他解釋：「好耐冇上台唱歌，少少發台瘟，綵排時候OK，但好耐冇試過四面台見觀眾，所以有少少失準。」記者打趣以為他唱《傾心》時想起某人才甩嘴？他笑言：「冇冇冇，冇對象，可能係唱《豈有此理》先有對象哈哈。」他又謂歌單由伍仲衡挑選：「啲歌同我一樣年紀大。（所以你唔識唱？）我有聽，但唱K少唱，所以記憶就冇咁熟。」

他又謂近排拍緊劇集《青春本我》，故有些攰，亦開心節目《#好掛住日本》出街後反應幾好：「本身都擔心，大家都拍得辛苦，但堅持信念係值得嘅。」他亦表示想快些開騷：「都有同公司講，可能之後會同Cousin Fung做個細啲嘅騷先。」