似MIRROR人生冇夏天 馮允謙着乜都要加外套原因係?

2021年10月17日 18:01
東網電視
更多新聞短片
歌手Jay Fung(馮允謙)今日(17日)打扮得官仔骨骨出席沙田馬場活動,更憑悉心打扮勇奪「最佳煲呔衣着大獎」殊榮,獲頒贈名錶作禮物。事後受訪時他笑言私下零Fashion感,出街只是普通T-Shirt加牛仔褲,全靠Stylist幫他「變身」,故對今次得獎非常開心:「自己好鍾意着西裝、燕尾服,但冇機會成日着,或者之後整套燕尾服嘅睡衣,哈哈!仲要係絲質質地,覺得咁樣好舒服。」
Jay笑稱自從做了歌手之後,便跟男團MIRROR一樣,人生再沒有夏天:「出活動點都要加件外套,之前冇咁做公司唔係幾鍾意,後尾發現加咗外套啲相影出嚟靚啲,所以乖乖聽話着。」講到禮物是名錶,自認對錶沒有研究的他,反而爸爸好鍾意,所以正考慮割愛:「好多年都冇送父親節禮物畀佢,之前問過佢想要咩,佢話鍾意錶,諗緊送唔送畀佢。(你唔會唔捨得?)唔會,佢開心就得!」
另外,提到他快將偕Janice(衛蘭)開騷,他直言最近每日都要綵排好忙:「到時除咗有合唱之外,仲會互唱大家嘅歌,所以要學好多新歌,對我嚟講都幾吃力,不過開心,依家仲有一個禮拜時間練習,我會有信心!」他又謂父母專登由加拿大飛港撐開騷,今早剛完成隔離放「疫監」回家:「即刻有攬吓、錫吓佢哋,上次同Ian(陳卓賢)開騷佢哋只係睇網上版,嚟唔到現場睇好內疚,其實細個嘅時候唔鍾意佢哋嚟睇我表演,覺得好緊張同怕醜,但依家唔同諗法,有佢哋喺度支持我會定啲、有正能量。」