為古天樂預祝生日　陳靜親手整蛋糕失敗皺晒皮

本月21日就係古天樂51歲生日，陳靜（DaDa）率先為老闆古仔預祝生日，同場仲有施念慈、姚柏南及謝高晉，DaDa今年已經係連續第二年為老闆慶生，可見關係融洽，合作又愉快。DaDa仲親手整生日蛋糕畀古仔，認真有心，不過見到個蛋糕皺晒皮，佢都大感唔好意思，留言話：「Happy birthday Mr.boss，原來整古早味蛋糕真係好唔容易，我已經焗第四個都唔成功，我記得上年整咗個斜嘅，今年整咗個皺嘅，我下年會再挑戰失敗生日蛋糕系列，今年好開心，大家一齊預祝生日快樂boss。」網友就安慰DaDa話最緊要心意。而年過半百嘅古仔，完全睇唔到歲月喺佢面上留下痕迹，仍然凍齡有術，睇上去好似40幾歲咋！