尹蓁晞冇啦啦飛釘　自爆上圍縮水！

藝人尹蓁晞（Yumi）以低胸造型出席生日派對，期間被發現胸前「凸點」，事後她透露因穿上Nude Bra無故反起，才引起這個尷尬，接着便不停整理。

面腫腫的她被問到身體狀況，Yumi表示：「幾好，之前做運動仲瘦咗，依家54公斤，比起最肥已經減咗10公斤，上年係甲狀腺問題令到成個人腫啫，依家都好番啦！（你都係面腫喎！）可能係尋晚飲咗好多水。（咁瘦咗上圍唔縮水？）之前都有縮水，縮減咗1.5cup，最近食番多啲蛋白質，身形先去番以前咁豐滿。」更指現時處於感情空窗期，故專注事業，如最近忙於做直播帶貨，多賺一點收入。

另外，藝人黃榕亦有出席生日會，早前於健美比賽終如願連奪兩個冠軍獎項，不過黃榕似乎未夠喉，表示會再接再勵，準備參加12月的另一個比賽。提到未能入選《全民造星IV》，當看到有關宣傳片時可會酸溜溜？她說：「又冇，只係一直想試吓參加真人騷。（可以試吓參選亞姐！）應該唔會，亞姐要講口才，我講嘢唔叻，因為朋友有參加，我嘅即時反應唔係咁好，只係鍾意表演跳舞同唱歌。（呢啲都可以搶分！）都唔會考慮。」