Anson Lo拍MV遇黑蜂突襲 雙手掩耳秒速入Mode

20211019
東網電視
更多新聞短片
有「百萬歌手」之稱嘅「教主」Anson Lo,新歌《Megahit》MV推出3星期再破400萬點擊,雖然近日被爆涉嫌抄韓團NCT成員、泰籍歌手TEN《Paint Me Naked》MV,但事後其經理人公司都回應咗只係咁啱撞衫。日前佢喺社交平台播出花絮片,自爆拍攝當刻現場長期有隻黑蜂陪伴住佢︰「頭兩Take全程聽到耳邊『嗡嗡聲』,不停叫自己忍住!然後第三Take…我失控了!」即刻有片有真相,片中見Anson Lo痞低Standby嘅時候一直都雙手塞住耳仔,仲不停四處張望露出忐忑不安嘅樣,估計係驚隻黑蜂隨時出現「突擊」佢,臨去到副歌前幾秒佢先放低手,仲一秒進入狀態做手勢,唱到英文Rap嗰Part,黑蜂突然出現,嚇到Anson Lo即刻大叫兼速逃,企喺佢身後嘅4個男Dancers忍唔住爆笑咗出嚟!
之後佢再喺限時動態重溫同一個鏡頭嘅第二Take,見Anson Lo同樣一嚟就塞住對耳,聽到經理人花姐嗌佢個名安慰︰「盧瀚霆,Roll機就冇事㗎啦!」而留言最後話︰「大家喺Dance Version見到嘅係第四Take~」個Hashtag仲要改編新歌歌詞「#原來」、「#和黑蜂的碰碰」、「#躲開比相撞更好」,認真抵死!有唔少「神徒」(Fans暱稱)留言大讚教主躲避黑蜂嘅舉動好可愛「咁Cute嘅咩你!」,有啲更自薦要保護偶像添!