許紹雄24歲獨女嫁得出　準外父見證囡囡被浪漫求婚

綠葉王許紹雄早年打本過百萬畀24歲獨女許惠菁（Charmaine）喺新加坡開cafe，佢自己都出錢出力，日日去Cafe打躉變打卡點，估唔到一轉頭，許紹雄就自爆阿女已經畀人「落咗訂」，獲靚仔男友求婚！

許紹雄晒出阿女獲未婚夫跪地求婚嘅相，牆上有「Will you marry me?」字樣霓虹燈，加上滿枱蠟燭，非常浪漫。而阿女Charmaine就索性晒出未婚夫孭起自己嘅「得米」相，兩個人甜笑互動旁若無人，Sweet到滲出Mon。今次求婚大作戰原來仲有一大班親友做見證，當然仲有許紹雄同太太撐場，眾人齊集泳池邊，仲舉杯對鏡頭合照，睇嚟未來女婿已經過咗許紹雄關，獲準外父親自現身促成美事。