新抱靠後台上位？曾志偉為王敏奕抱不平

曾志偉如今日理萬機，總要在事業和家庭有所取捨，面對老友陳百祥指他為事業犧牲了家庭，志偉坦承事實：「不嬲都係，我所有時間放喺事業，拍電影年代，仔女見朋友多過見我，好在仔女（曾國祥、曾寶儀）都係做呢行好明白，不過依家我想見仔都難啦！（叫佢幫無綫拍劇？）我諗冇乜機會，佢好忙又好紅，好多劇本要寫，3、4月返嚟又開另一套，所以應該唔會住。」對於新抱王敏奕被指有後台，志偉表示這說法對她不公平：「佢識我個仔時已經係演員，我嗰時都未返無綫，完全唔係因為我喺度令佢逐步上位，同我完全冇關，如果係咁，呢樣嘢害咗佢添，其實佢好努力。（想唔想快啲生個孫畀你湊？）唔使啩？生畀我做乜，不過冇一樣嘢百分百肯定，所以到時先算。」