冷鋒到 喺時候食野味養生暖身菜

2021年10月20日 17:00
東網電視
更多新聞短片
天文台預料冷鋒會喺聽日橫過華南沿岸,周末氣溫顯著下降,更跌至攝氏20度以下添!天氣又寒又乾燥,係時候食番啲暖身養生菜,強身健體又驅寒,最近就有餐廳帶來暖身野味、養生食療及煲仔菜,讓大家享用美饌之餘,亦能暖身養生。
歐洲野味好強身
秋風起,相信食饕首先諗起嘅必定係野味,暖身又強身,而尖沙咀香港喜來登酒店嘅蠔酒吧就由即日起至10月31日、由Chef Oscar設計了多款全新歐陸野味美饌,用上來自法國Etampes嘅野味,炮製出黃麂柳薄切、野鴨胸配洋葱撻、鹿肉威靈頓、法式獵人凍批及鴨肉清湯等。野鴨胸配洋葱撻用上肉味特別濃且富嚼勁嘅野鴨鴨胸,大廚先用百里香、乾葱、迷迭香、蒜頭及香草等醃過夜至入味,再慢煮45分鐘,伴陳皮、花椒及海藻粉Purée而成嘅柑橘醬汁,辟膻又提鮮。而具健脾補益、強健身體之功效嘅黃麂則炮製成黃麂柳薄切,以肉桂粉、胡椒、少許辣椒粉醃過後用焗爐輕烤,伴紅菜頭及金紅菜頭,賣相精緻,令人食指大動。
時令食材養生宴
中國傳統飲食智慧是不時不食,踏入秋天,「寒來暑往,秋收冬藏」,係時候以溫熱食物滋補調理及保健養生,沙田帝逸酒店逸軒就以節氣保健為概念,由即日至11月21日期間,推出8道菜「廿四節氣秋日養生宴」(4位、8位或12位用)。養生頭盤係山葵葱油海蜇、酒香拖肥黑豚肉、金剛沙脆豆腐及魚籽酥炸日本蠔;還有北海道牛乳燉海參雞湯、黨參紅棗雲耳蒸龍躉球、雪裡紅葱燒花膠伴鵝掌、果木煙熏脆皮妙齡乳鴿、肚杞子浸菜苗、甜梅菜海膽豚肉炒珍珠絲苗及甜品薈萃。沙田乳鴿素仔聞名,而餐廳以先烤後熏嘅烹調方法保留妙齡乳鴿肉汁之餘,還散發陣陣獨特香氣,令人回味。
瓦煲熱住上惹味十足
城中人氣川菜餐廳麻辣燙Chilli Fagara最近亦帶來時令煲仔菜,暖心又暖胃。菜式有三杯雜菌煲、京葱鍋燒豆腐煲、雙冬羊腩煲、啤酒鴨煲、花雕牛尾煲、天府銀絲蟹煲及四川臘腸雞煲。推介坊間少有嘅花雕牛尾煲,牛尾煮得軟腍,配多款鮮蔬包括番茄、紅蘿蔔、獨子蒜及陳10年花雕酒,蔬菜吸收醬汁精華,超級美味。煲仔菜式均用上優質海產及食材香料等炮製而成,以燒熱嘅瓦煲盛載,上菜時再點上底部蠟燭將熱鍋微微溫熱住,可以說秋風再涼,身心都暖笠笠。