借狗招親?菊梓喬拍片搣蕉皮 賣萌求愛

20211020
東網電視
更多新聞短片
「星夢一姐」菊梓喬(Hana)同型男吳卓羲嘅緋聞曇花一現,家陣恨拍拖又冇拖拍嘅佢,惟有一邊整佢嘅「零罪惡感嘅Tiramisu」,一邊開出擇偶條件,仲話佢呢個Tiramisu食幾多都唔驚,最好係同屋企人一人一舊,如果有男朋友就成個塞畀佢食,又無啦啦咁話:「阿花冇男朋友呀,可唔可以求介紹呀,可唔可以介紹啲男朋友畀阿花識呀?阿花仲係黃花閨女嚟。」
原來佢口中嘅阿花,就係佢身邊嗰隻不停吠嘅狗狗,佢又補充話:「記住如果有好嘅男仔,4歲以上嘅狗仔,其實貓仔我覺得都ok,大家都可以做個朋友,可以同我個「女」約見吓,我個女除咗倀雞少少,吠得大聲咗少少,其實係冇乜缺點嘅,佢係個非常可愛嘅BB。」好多網民就話聽阿花嘅吠聲,似乎正抗議主人老屈佢春心動,又有網民估其實係單身Hana想網上求愛,但又唔好意思,惟有借阿花過橋,仲有人笑阿花物似主人形都係盛女一族。
單望條片都感到Hana係好女仔,除咗識整用即食麥片、低脂兼無糖乳酪、可可粉、香蕉整健康甜品外,尤其見佢搣蕉皮都可以咁萌,切香蕉時又咁溫柔,就知佢係個可愛女人,搵到佢做女朋友,真係大把口福好。其實佢除咗手藝好,仲好有姿色,早前佢就着咗條開胸裙出嚟影靚相,平時目測身材平平無奇嘅佢,多得佢嗰條罅,先發覺原來佢都幾有料,絕對唔係「飛機場小姐」嚟嘅。