《喜劇之王》被星爺彈下體男孩近照曝光　原來實情係？

1999年上映嘅電影《喜劇之王》「名場面」多多，其中有一幕係周星馳見到一個全裸嘅小男孩，出手彈對方嘅「小小鳥」，由於小男孩圓碌碌，樣子趣致，雖然冇對白，全程只係行行企企，但出場短短幾分鐘，呢幕「星爺彈小鳥」，令人印象深刻，至今22年，呢個畫面成日被網民翻炒再翻炒，甚至用嚟做表情Sticker。

最近有網民就指搵到呢位童星嘅社交網，大家都好奇長大嘅佢依家係咩樣？網上瘋傳呢位童星叫張紅攀，來自貴州，當年拍攝《喜劇之王》時只有兩歲，更將佢近照曝光，依家嘅佢同細個一樣有肉地，皮膚白白淨淨，而佢對演藝仍然好有興趣，曾經參加一個名為《喜劇之王》的電視選秀節目，因而人氣急升，社交網有300萬粉絲追隨。

但有心水清嘅網民翻查資料，指張紅攀唔係《喜劇之王》入面裸體小男孩，因為《喜》於1999年2月上映，而張紅攀於1999年出生9月出生，所以計番條數，張紅攀當時仲未出世，冇可能係被星爺彈下體嘅小男孩，至於真身係邊？依家仲係個謎。雖然張紅攀被認錯，不過錯有錯着，反而令佢有更多人關注！