《星空》鍾嘉欣首位病童　喬喬原來音樂造詣滿分

台慶劇《星空下的仁醫》現正熱播，其中重返無綫嘅藝人鍾嘉欣最備受期待，雖然身在加拿大嘅佢未能回港宣傳，但仍緊貼劇集播放，於社交網發文造勢。

劇情講到鍾嘉欣為負責嘅第一個病人女童「喬喬」完成心願，幫忙舉辦音樂會，戲外鍾嘉欣則大晒2人合照，又分享幕後花絮，原來飾演戲中精通長笛嘅「喬喬」嘅童星陳卓妍（Angel），現實同樣音樂造詣了得，喺拍攝現場即席大玩手指琴，為鍾嘉欣伴奏唱出劇集主題曲《好好珍惜自己》，充滿默契。

其實Angel係少女樂隊Busy Bee Girls（BBG）嘅主音，亮相過唔少舞台作慈善演出，更曾於2019年舉辦音樂會，當時更請得藝人阮兆祥做嘉賓，前途無可限量。