胡鴻鈞操肌準備開騷　講明想蔡思貝捧場

歌手胡鴻鈞今日（21日）到電台接受訪問，宣傳演唱會及新歌《謝謝你的應援》。他透露近日正為演唱會忙於綵排及宣傳，他説：「新歌係一首抒情歌，係送畀歌迷嘅，都係切合番演唱會主題，演唱會都忙住排舞，都唔知點解我啲歌迷對我勁歌熱舞咁大期望，咁我都希望可以畀到驚喜大家嘅。（會唔會騷肌？）睇吓操成點啦，要過到自己嗰關先得，依家keep住做健身。」

他透露已邀請炎明熹（Gigi）和鄭欣宜（Joyce）擔任表演嘉賓，問到會否與Joyce跳辣身舞，他說：「佢啲舞好得㗎，我哋仲研究緊，睇吓點樣演出係最好睇，希望畀到驚喜大家，而唔係畀驚嚇啦！」問到緋聞女友蔡思貝會否捧場，他説當然希望對方能出席，但若有工作在身當然以工作行先。講到之前被網上抵制事件，他感謝大家關心，指做好自己工作就是最好回應。