童星請食檸檬　Anson Kong激到黑面！

人氣男團MIRROR成員Anson Kong（AK）大隻有型，早前一輯爆肌照更係迷倒萬千少女，不過呢日佢竟然慘遭女仔「請食檸檬」，甚至被當眾落面！

事緣近日佢與曾於無綫劇集《BB來了》飾演「允豬」嘅童星妃頤合作拍廣告，期間妃頤講到最鍾意嘅藝人，正當AK滿心歡喜以為係自己嘅時候，點知童言無忌嘅妃頤竟然直指：「我鍾意睇好靚仔嘅姜B（姜濤）！」令AK即時展現招牌黑面。

之後妃頤續介紹自己最鍾意嘅歌曲，AK本來以為今次終於輪到自己時，妃頤竟再次唱出姜濤嘅歌曲：「我鍾意好好聽嘅『So I say I love you』」，並再補一刀：「我希望可以下次同姜濤一齊合唱呢首歌啦。」令AK大受打擊面如死灰，仲呷晒醋咁話：「聽唔聽到呀姜濤？」場面搞笑。