李雲迪涉黃被拘　李元玲證從未越師生關係

中國著名鋼琴家李雲迪尋日（21日）涉黃被拘，唔少人即刻同佢劃清界線，當中就有愛徒、馬來西亞鋼琴女神李元玲，喺事件發生數小時後，終於開腔回應。李元玲本身上載多條自己打機嘅片段後，隨即喺社交網回應事件，指自己一直都喺度打機，見好多網友追問佢件事真定假，佢先上網Search相關新聞，佢仲強調：「我也中槍了……請大家不要問我，I have no comment.」雖然極力撇清關係，不過佢仍然為恩師發聲：「我只知道他是一個很有才華的鋼琴家，人很Nice～從來沒有越界師生關係。」

至於尋日深夜，內地記者採訪到李雲迪恩師、81歲鋼琴家但昭義，談及得意弟子李雲迪喺北京嫖娼被拘留嘅新聞，老人家嘆氣，然後回應道：「我很生氣！李雲迪讓我感到很痛心！李雲迪作為公眾人物，應該從各方面嚴格要求，不能犯這樣的大錯！」並續連聲3次說：「感到很痛心啊！很痛心啊！很痛心啊！」