無綫節目巡禮︱來年劇集「捧蛋」　李佳芯阿Q精神冇所謂

視后李佳芯（Ali）與陳凱琳出席《無綫節目巡禮2022》，2人於來年劇集列表中都「捧蛋」，而出場時，Ali又跟近來主打綜藝節目的黎諾懿一同出場，看似明年重心都放於綜藝節目，不過她受訪時謂：「唔係，我嚟緊11月咪拍劇囉！工作都係等公司安排。（點解同諾懿一齊出場？）拍檔嚟嘛，梗係要撐佢，同埋呢啲都係公司安排，冇所謂啦！有劇咪拍劇，有節目咪做節目，有飯咪食飯囉！（好似好唏噓咁！）唔係，有嘢做已經好開心，不過我都鍾意做綜藝節目。」

而陳凱琳之後會拍明珠台節目，她說：「有一日曾生（曾志偉）發掘咗我，話原來我英文咁好㗎！自己都係外國長大，講英文會舒服啲，之後會幫明珠台做Talk Show節目，拍劇太長時間暫時就未必會喇！」