Lokman唔敢碌爆卡：阿媽教落唔可以先使未來錢！

人氣男團MIRROR成員Tiger（邱傲然）與Lokman（楊樂文）今日（22日）出席「滙豐EveryMile信用卡發布會」，講到用信用卡換飛行里數去旅行，2人指相信全球的人都好想去旅行，Lokman說：「我每次見到天上面嘅飛機都會嘆一句幾時可以去旅行，如果可以飛我最想去泰國同台灣，狂食當地嘢。」Tiger就最想去日本買衫。

至於有否試過欠卡數，他們都自稱很有節制能力，Lokman表示：「我從來冇試過碌爆卡，因為阿媽教落唔可以先使未來錢。」Tiger稱自己年紀尚輕，未有機會可以碌爆卡。他們坦言大多開支都用在飲飲食食，Lokman自言對食方面不會太計較金錢：「食得開心，個人都會開心啲，會覺得好滿足，試過食咗啲唔好食嘅嘢，真係會唔開心。」Tiger就話經常會跟自己講，工作完就要食餐好。

另外，講到明年在紅館個唱的日期，Lokman稱仍未知確實日子，並自嘲：「我呢啲低級員工唔會咁早知，多數係2、3個月前先知，我哋都想早啲知，可以早啲準備，好期待演唱會。」